“Боловсролын цахим шилжилт”-ийн хүрээнд багшийн өдөр тутмын сургалт үйл ажиллагаанд болон мэдлэг, боловсрол олж авах арга хэрэгсэлд цахим сургалтын хэрэглэгдэхүүн чухал нөлөө үзүүлэх болсон төдийгүй мэдээлэл технологийн салбар асар хурдацтай хөгждөг учраас үргэлж суралцах шаардлага байдаг. Иймээс Сайншанд сумын 3,10,12-р цэцэрлэгүүд сургалт үйл ажиллагаандаа ухаалаг дэлгэц зэргийг ашиглан цахим хичээл, контент бүтээж байгаа бол мөн Үндэсний контент үйлдвэрлэгч “ARGUN GROUP”-ийн IPAD, IPTV зэргийг Замын-үүд сумын 5,6-р цэцэрлэгүүд хичээл сургалтын үйл ажиллагаанд нэвтрүүлэн ажиллаж байна. Цахим сургалтын уг хэрэглэгдэхүүн нь өнгө, дүрс, нягтаршил сайтай, хөдөлгөөнтэй, үзэх агуулгыг сонирхолтой байдлаар агуулсан байдгаараа онцлог бөгөөд багш, хүүхдэд сургалтын үйл ажиллагааг сонирхолтойгоор, бодит орчинд нь байгаа мэт сэтгэгдэл төрүүлэхүйц хүргэх боломжтой юм.
Мөн Дэлхийн багш нарын баярын өдрийг угтан “Speed action” ХХК-иас Mind Tech ухаалаг дэлгэц хэрэглэгчдийн дунд зарласан цахим видео контент бүтээх уралдаанд Сайншанд сумын 12-р цэцэрлэгийн багш Н.Наранбаяр амжилттай оролцож 3 дугаар байрт шалгарсан байна.
